ᐱᓕᕆᕝᕕᐅᑉ ᒥᒃᓵᓄᑦ

ᐃᓕᖅᑯᓯᓕᕆᔨᒃᑯᑦ ᓴᖅᑭᑕᐅᓚᐅᖅᓯᒪᕗᑦ ᓯᕗᓕᐅᖅᑎᒋᔭᐅᔭᕆᐊᖃᕐᓂᖏᓐᓄᑦ ᓄᓇᕗᑦ ᒐᕙᒪᒃᑯᑦ ᐱᕙᓪᓕᐊᑎᓪᓗᒋᑦ ᐊᑐᓕᖅᑎᑦᑎᕙᓪᓕᐊᑎᓪᓗᒋᓪᓗ ᐊᑐᐊᒐᖏᑦ, ᐱᓕᕆᐊᖏᑦ ᐱᔨᑦᑎᕋᐅᑎᖏᓪᓗ ᑐᕌᕈᑕᐅᔪᑦ ᓴᙱᒃᑎᒋᐊᕐᓂᕐᒧᑦ ᐃᓕᖅᑯᓯᕆᔭᐅᔪᖅ, ᐅᖃᐅᓯᖅ, ᐱᖅᑯᓯᖅ ᐊᒻᒪ ᐃᖃᐃᓕᓴᕐᓂᒃᑯᑦ ᓄᓇᕗᒥᐅᓄᑦ. ᐃᓄᖕᓂᒃ ᐊᒻᒪ ᓄᓇᕗᑦ ᒐᕙᒪᒃᑯᓐᓂᒃ ᐱᔨᑦᑎᕋᖃᑦᑕᖅᐳᑦ ᑐᑦᑕᕐᕕᖏᓐᓃᖦᖢᑎᒃ ᐃᖃᓗᖕᓂ, ᖃᒪᓂ’ᑐᐊᕐᒥ, ᐃᒡᓗᓕᖕᒥ, ᖁᕐᓗᖅᑑᒥᓗ. ᐃᓕᖅᑯᓯᓕᕆᔨᒃᑯᑦ ᐊᓂᒍᐃᔪᓐᓇᕐᓂᐊᖅᑐᑦ ᐱᓕᕆᐊᕆᓇᓱᒃᑕᒥᓂᒃ ᐃᒪᐃᓕᐅᖅᐸᒡᓗᑎᒃ: ᓯᕗᓕᖅᑎᒋᔭᐅᓗᑎᒃ ᒐᕙᒪᒃᑯᑎᒍᑦ ᐃᓄᐃᑦ ᐃᓕᖅᑯᓯᖏᑕ ᑐᙵᕕᖏᓐᓂᒃ ᐱᐅᓯᒋᐊᖅᑎᑦᑎᓗᑎᒃ ᐱᓇᔪᒃᐸᒡᓗᑎᒃ ᐃᓄᐃᑦ ᖃᐅᔨᒪᔭᑐᖃᖏᑎᒍᑦ ᐱᓕᕆᔾᔪᓯᒃᑯᑦ; ᐃᖅᑲᓇᐃᔭᕐᕕᖕᓂ ᐃᓄᒃᑎᑐᑦ ᐅᖃᓪᓚᖕᓂᖅᓴᐅᓕᕐᓗᑎᒃ ᐊᒻᒪ ᓄᓇᕘᓕᒫᒥ; ᑐᑭᓯᒋᐊᕈᓐᓇᖅᑎᑦᑎᔨᐅᔪᑦ ᐊᑐᐃᓐᓇᐅᔪᓂᒡᓗ ᐱᓯᒪᒃᖠᖅᑎᐅᓪᓗᑎᒃ ᓄᓇᕘᒥ ᐅᖃᐅᓯᖅᑕᕆᔭᐅᔪᓄᑦ ᓄᓇᓕᓕᒫᓂᒃ; ᐱᐅᓯᒋᐊᖅᑎᓪᓗᒍ ᓄᓇᕘᓕᒫᒥ ᐅᖃᓕᒫᒐᖃᕐᕖᑦ; ᐃᑲᔪᖅᐸᒃᖢᑎᓪᓗ ᑮᓇᐅᔾᔭᒃᓴᕋᓱᐊᖅᑎᐅᙱᑦᑐᓂᒃ, ᓄᓇᓕᖕᒥᐅᓂᒃ ᑲᑐᔾᔨᖃᑎᒌᓂᓪᓗ ᐃᓕᖅᑯᓯᕐᒧᑦ, ᐅᖃᐅᓯᕐᒧᑦ ᐊᒻᒪ ᐱᐅᓯᑐᖃᕐᒧᑦ ᐱᓕᕆᔾᔪᓯᕐᓂᒃ; ᖃᐅᔨᒪᔭᐅᓕᖅᑎᑦᑎᓗᑎᒃ ᐃᓅᓯᖃᑦᑎᐊᕈᓯᐅᔪᓐᓇᖅᑐᓂᒃ ᐃᑲᔪᖅᐸᒡᓗᑎᒃ ᐱᙳᐊᕆᐅᖅᓴᖅᐸᓪᓕᐊᓕᓵᖅᑐᓄᑦ ᓄᓇᓕᖕᓂᓪᓗ ᐱᙳᐊᖅᑐᓕᕆᓂᕐᒧᑦ ᐱᔭᒃᓴᓂᒃ, ᑎᓕᐅᕆᕙᒡᓗᑎᓪᓗ ᐅᖃᖃᑎᒌᖏᓐᓇᖃᑦᑕᖁᔭᐅᓗᑎᒃ ᐃᓐᓇᐃᑦ ᒪᒃᑯᒃᑐᓪᓗ ᐊᒻᒪ ᒐᕙᒪᒃᑯᑦ.

ᐅᖃᐅᓯᕐᒧᑦ ᖁᕕᐊᓲᑎᖃᕐᓂᖅ 2011ᒥ

ᐅᖃᐅᓯᕐᒧᑦ ᖁᕕᐊᓲᑎᖃᕐᓂᖅ ᐱᔾᔪᑎᒋᓪᓗᒍ, ᓄᓇᕗᓕᒫᒥ ᐃᓄᐃᑦ ᐅᖃᐅᓯᖓᓐᓂᒃ ᖁᕕᐊᓲᑎᖃᕐᓂᐊᕋᑦᑕ, ᕖᕝᕗᐊᕆ 7ᒥᑦ-11ᒧᑦ, 2011. ᐅᖃᐅᓯᕐᒧᑦ ᖁᕕᐊᓲᑎᖃᕐᓂᐅᑉ ᐅᓪᓗᕆᔭᖏᓐᓂᒃ ᐅᔾᔨᕈᓱᑦᑎᐊᕐᓗᑕ ᐃᓄᒃᑎᑐᑦ ᐃᓄᐃᓐᓇᖅᑐᓪᓗ ᐅᖃᐅᓯᕗᑦ ᐊᑐᓚᐅᕐᓚᕗᑦ ᐱᒻᒪᕆᕐᔪᐊᖑᓂᖓᓂᒃ ᑭᓇᐅᓂᑦᑎᓐᓂ ᓇᓗᓇᐃᖅᓯᔾᔪᑎᑦᑎᐊᕙᐅᖕᒪᑦ.

ᐃᓕᖅᑯᓕᓯᕆᔨᒃᑯᑦ ᐃᓕᔅᓯᓐᓂᒃ ᐃᓚᐅᖁᔨᑦᑎᐊᖅᐳᑦ ᐱᓕᕆᔭᒃᓴᓕᐊᖑᔪᓂᒃ ᐅᖃᐅᓯᕐᒧᑦ ᖁᕕᐊᓲᑎᖃᕐᓂᐅᑉ ᐅᓪᓗᕆᓂᐊᖅᑕᖏᓐᓂᒃ, ᐅᑯᐊ ᑕᕝᕙ ᐱᓕᕆᔭᒃᓴᓕᐊᖑᔪᑦ: ᐅᖃᐅᓯᑐᖃᐃᑦ ᐊᑕᐅᓯᐅᑦᑕᕐᓗᑎᒃ ᓴᖅᑭᖃᑦᑕᕐᓂᐊᖅᑐᑦ ᒐᕙᒪᒃᑯᑦ ᐃᑭᐊᖅᑭᕕᖓᒍᑦ. ᖃᐅᑕᒫᑦ ᑐᑭᖏᑦ ᓇᓚᐅᑦᑖᖅᑕᐅᔪᓐᓇᖅᑐᑦ, ᓇᓚᐅᑦᑎᔪᖅ ᐊᒧᔭᒃᓴᓐᖑᖃᑦᑕᕐᓂᐊᖅᑐᑦ ᐱᓇᓱᐊᕈᓯᖓᑕ ᓄᕐᖑᐊᓂ. ᐊᑕᐅᓯᕐᒥᒃ ᐊᒧᓯᓂᐊᖅᑐᒍᑦ ᓵᓚᒃᓴᖅᑐᒥᒃ.